U grub di rishutho du Gabo du Huyodo Mshihoyo Demoqratoyo CDU di mditho d’Hamburg ksoned i kampanya da imdat du nfoqo du moro li dayro d’Mor Gabriel, dekmisomo bi rishutho du qoyumo d’Urifi Elmar Brok. U grub d’CDU d’Hamburg bu buyono reshmoyo de fresle mawdacle u snodayde li dayro d’Mor Gabriel, ulu camo Suryoyo dekhoye b’Turabdin.

U grub du gabo da mshihoye demoqratoye d’Almanya bu buyono de fresle bhaq di sbuthathe komer. "I Dayro d’Mor Gabriel lfuth du fusqono du bethdino celoyo di qutnutho d’Turkiya, kiba demvayco falqo rabo ma arcothayda dekmidec hani mowat eshne di dayrone. Anarcotho da Suryoye hani eshne me sababe du burokrasi lo sim elayye tapowiye  b’Turkiya. Bi netije du insiyatif dsemlan ahna u parlamento federal d’CDU, u rishwazire du zabnawo Bulent Ejewit huwole wacdo gedmelbek bu shwolano, elo a fulhone du syomo da tapowiye sim hboso aclayye. Mo ba mo idicoyo i dayro d’Mor Gabriel dketla makthabzabno d’1600 eshne i merto dan arcotho dekmidace ebeyeyo. Uba tahwiyotho mathbet di dayro ma 1937 kobo u madatho u wergi danarcothani. Camgabedathe kowe hjome cal hen ma dkothe dekhoyen a suryoye ebayye. Calathe u parlamento d’Urifi bi rishutho du qoyumo Elmar Brok mabdele kampanya da imdat leshan du snodo di dayro d’Mor Gabriel.“

B’Nisho dmesned u insiyatifano cal eshmed du grub d’Hamburg u qoyumo Christoph de Vries wu mmathlono du camo Suryoyo Abut Jan dsemme qroyto lu camo d’Hamburg dmeshtawtefi li kampanyathe da imdat, merlen, „U gbosho danarcotho d’Mor Gabriel lekmitaqbel. Wu medano kemthabed Turkiya bu doro da 21 latyo lfuth da standarte d’Urifi, layba hirutho tawdithoyto, da zedqe da qalilwotho lekmihamen. U fusqono du bethdino celoyo u dewam, di lo kinutho demdawamla hani dore cala mshihoye b’Turkiya’yo. Ubu shekelano kmefhem qay u menyono da mshihoye b’Turkiya meqem dketwe ba malyune, wocdo nahet noqus ma 100 alfo. İ sbutho d’Mor Gabriel kmahwiyoste, ba shartat dadyawmaste hesh u hjomo lo khales. A gedshani kemthabti, layto hirutho tawdithoyto b’Turkiya, wa qalilwotho mshihoye latte cayni zedqe khda grube tawdithoye hrene. Ksaymina qroyto l’Turkiya duyo b’tolerans, udsaymo usutoro da barmothoyayda a mshihoye.“

U buyono d’CDU d’Hamburg kmawdecste a talabe dketle m’Turkiya, dketne, „Bshekel qriho ktelbina m’Turkiya dmafito u fusqonano dida naqla hreto mquli cayno. A Suryoye b’Turkiya hesh kcayshi tahtu tehdit, di delmiye, uda hjome. E sheltonutho d’Turkiya leklozem dfaysho mfarjonitho. Ahna ksaymina methcadronutho cama Suryoye d’Turkiya, uksendina i kampanya du Parlamento d’Urifi.“