A rishone tawdithoye u folitiqoye du camaydan bu Iraq mhanelen a Mashelmone du athro bi munasabe du cedo du Ramadan. Ban egrotho defrisi, arishone tawdithoye u folitiqoye du camaydan mawdacce d'kette sabro du cedano dhowe dewam la fulhone du bnoyo du Iraq demoqratoyo hatho.

Bi munasabe du cedo du Ramadan dkemcaydile a Mashelmone debritho, i Qadishutho du Fateryarkho di Cito Cateqto d’Madenho Mor Aday Trayono mhanele u camo Iraqoyo, atloth rishonwotho du athro wi rishonutho du Qlimo d’Kurdistan.

Bi egarthayde Mor Aday mahwele usabrayde du cedano du Ramadan dmaqwe i mshaynutho wi shalyutho bu Iraq, u demshawshet an aghre du shlomo u di ahonutho bayn da came umthoye mshahelfe dekhoyen ebe.

Mkhasra hreto, u Fateryarkho di Cito Kaldoyto d’Bobel Mor Cammanuel Tlithoyo Delli bi egartho defresle bu cedo du Ramadan mhanele a Mashelmone du Iraq wu tleble m’Aloho dmaster ucamo Iraqoyo mkul bishutho.

Camgabedathe, u Kunosho da Tukose Folitiqoye du Camaydan u Kaldoyo-Suryoyo-Othuroyo bi egartho defresle athmel mhanele a Mashelmone du Iraq bu cedo du Ramadan, u mahwele u sabrayde du cedano dmamte acme muzogho shalyo, shlomo, u shawtofutho bayn da came umthoye mshahelfe bu athro bnisho demdawmi afulhone du bnoyo du Iraq hatho lfuth an aghre di hirutho, di demoqratoyutho u di kinutho.