U tukoso emwothoyo dkemdafec a’zedqe noshoye Human Rayts Wotch tleble mu rishqono d’Amerika Barak Obama dmabde buqore bhaq da teshniqe dsimi, mqabel da hbishoye bu zabno du rishqutno dmeqem George W Bush. Mkhasra hreto, Human Rayts Wotch themle a’haylawotho saqebloye b’Libya dsemlen hawbe mqabel da zedqe noshoye.

Bu buyono defresle adyawma Human Rayts Wotch tleble mu rishqutno d’Amerika Obama dmabde buqore bi sbutho da gunhe du teshniqo dsimi bhaq da hbishoye bu zabno du rishqutno dmeqem Bush. Bu tarano u tukoso emwothoyo merle “kito ithbate dsim teshniqo rwiho bhaq da hbishoye b’amro dmid m’George Bush. Mawkha a’buqore klozem dmisomi cam Bush wu mcadronayde, u waziro du Sutoro wu rishono dan İstikhbarat Amerikoye”.

Bu zabno demrayshanwole George Dabelyu Bush i mdabronutho d’Washington mdafacwole hen ma sheklat da teshniqe dsimi mqabel da hbishoye, hatheste bi dacwa dketwen a’teshniqanek ulsoye dmenfeq mqabel da hçome dkowen calu athro d’Amerika.

Mkhasra hreto, Hyumen Rayt Wotç themle a’haylawotho saqebloye lu rejim d’Libya dsemlen hawbe mshahelfe mqabel da zedqe nushoye. U tukoso emwothoyo dkemdafec a’zedqe noshoye greshle u zuhoro calu tewqido da bote, u tenhibo da mulkone wa dyoshe hrene dsimi mqabel da mdinoye.

U tukoso emwothoyo thkerle dehzele hen ma hawbani dsimi mqabel da zedqe noshoye, u dlaqi hen ma sohude di cayno, hawkha mdawamla “a’haylawotho saqebloye cama noqufaththe hulen darar rabo la mulkone, mawqadlen hen ma bote, manhablen a’botaykrihe a’bote wa’dukane, umhelen lhen farsufe cal deksendiwo i shultonutho”.

A’thomani d’Human Rayts Wotch kmahrewi i surto da haylawotho saqebloye demqadamwolen ruhayye lu kensho tibeloyo khed mdafcone cala zedqe noshoye bu athro d’Libya dekhokamle u rejim d’Qaddafi.