Emwotho Mhaydotho maqbela i rmoyto demqadmole u Huyodo Caraboyo mqabel du cnufyo dekmisem b’Suriya. I rmoytathe dem'aydo mi sagiyutho dan athrawotho hadome b’Emwotho Mhaydotho, gedmazido u hboso calu rejim d’Suriya b'nisho dmitakle u cnufyo, u dhowe demoqratoyutho bu athro.

Athmel u mawtbo gawonoyo d’Emwotho Mhaydotho semle ytawto dilonoyto lashan doresh i rmoyto demqadmole u Huyodo Caraboyo cali sbutho du kriz admonoyo d’Suriya lfuth du qonuno emwothoyo du mnoco da takhtushe mzayne.

Bu quwolo dsim athmel, u mawtbo gawonoyo d’Emwotho Mhaydotho maqbela i rmoyto caraboyto deme aydo me 137 athrawotho hadome, mqabel d’12 athrawotho derfedolen. Beyn danathrawotho de fredde i rmoyto ketwo Rusya wu Sin. 17 athrawothoste lulen qolaye.

Bi netije du quwolo dsim, u mmathlono d’Suriya b’Emwotho Mhaydotho Bassam Al Jacfari merle “u fusqonano gedmahru i aykanoyutho zetter, u gdemshajec a marehbone”.

Bcayni zabno, Al Jacfari bu mamlo dsemwole themle an’athrawotho du Mawtbo di Methcadronutho du Khalij dkemqadmi u snodo folhoyo u folitiqoyo la grube di saqebloyutho d’Suriya u kemshajcilen demdawmi ba hjome maherwone u marehbone mqabel du camo d’Suriya wi shultonuthayda.

Al Jacfari ba melani mdawamle “u Huyodo Caraboyo kfoleh lfuth du fusqono dekmaydile an’athrawotho du Khalij, ukemtayeb plan mqabel d’Suriya”.

İ rmoytathe dmaqeblo me Emwotho Mhaydotho kmasliyo u dyosho da zedqe noshoye b’Suriya, ukemtalbo dmitakle u cnufyo bu athro. Bcayni zabno i rmoytathe dekmesnodo man athrawotho Caraboye ktelbo mu rishqutno d’Suriya Bashar Al Assad dmestacfe mi wolithayde, ukmehshowo u insiyativ haroyo lu shroyo du kriz admonoyo b’Suriya.