U hjomo folhoyo dmabdewole u gayso d’Suriya mqabel di mditho d’Hemes hesh kemdawem. Camgabedathe, adyawmaste cam cruto hathto lu snodo d’Hemes, mtayeb tagelyotho du protesto bu slogan "u mrodo camoyo".

Hul 14 farsufe qtili adyawma safrayto bu hjomo folhoyo dkemdawem cali mditho d’Hemes uba bughre dmarisi cala tagelyotho demtaybi ba mdinotho mshahelfotho bu slogan “u mrodo camoyo”.

Lfuth du shutoso d’Suriya deksoyem duyoqo cala zedqe noshoye, a haylawotho di mshaynutho mabdelen adyawma hjome cala tagelyotho dsimi b’dukotho mshahelfotho baynothaye i shawtho d’Almazze bi mditho de Darmsuq deqtil eba farsufo wu mjareh 12 hrene, uba mdinotho d’Duma, Kfar Batna, Alqadam, Alcassali u Cartuz dketne hedor Darmsuq.

Camgabedathe, a hfite bi saqebloyutho d’Suriya mawdaclen demtayeb tagelyotho bi mditho d’Dacel bi highmonutho d’Darca, ubi mditho d’Alrastan bi highmonutho d’Hemes, uba mdinotho d’İdleb, Der Alzor, Qameshlo, Camuda wi Derbesiye.

Mkhasra hreto, kemdawem u ambargo dmahet cali shawtho d’Baba Camer bi mditho d’Hemes dekhoye eba hedor 100 alfo bnaynosho, bu zabno dkemdawem u hjomo folhoyo acle ucala shawthawotho hrene da mtagelyone khdi shawtho d’Alkhalidiye, Albayyada, Al İnshaat u Karm Alzaytun.

Bi mawdconutho dhule u hadomo bi sictho gawonoyto du qawmo d’Suriya Hadi Alcabdalla, mathkarle du hjomo dsim adyawma cali shawtho d’Baba Camer kemathel u hjomo qashyo dkulle dmabdewole cali shawthathe me tarte shabe, umerle “kul qatinto kmihaleq arbac foqucwotho cali mditho d’Hemes, bu zabno dekmisem ste cuqono oyaroyo cali mditho dekmehshowo i erishkoyto du qawmo camoyo d’Suriya”.