An abne du camaydan dekfelhiwo khed fqide ba shutose di shultonutho d’Boghdod, ucdo kloqen qetre u casqotho momunoye bether mdemgalwelen lu qlimo d’Kurdistan. A farsufani dmaqbele u qlimo dfelhi bcayni wolitho, ba zabne haroyani lefayesh kmitahwelen aghre awkith mcashat du yarho.

Bether mu qtolcamo mahishono di Cito d’Sayedet Alnajat da Suryoye Qatholiqoye b'Boghdod, mgalwewole menyono celoyo man eqrotho du camo Kaldoyo-Suryoyo-Othuroyo lu qlimo d’Kurdistan, bnisho dcoyesh b’muzogho mshayno.

Lfuth du insiyativ dembayanwole u rishono du qlimo Mascud Barzani, an’abne du camaydan dketwen fqide ba shutose di shultonutho b’Boghdod hshiwi khed hadome fqide ba dayrat di shultonutho du qlimo l’zabno d’6 yarhe, ukibe dmitawrekh u fulhonaththe bether medkomel u zabno dhiw elaye. Callathe bether mdehthimi an’eshto yarhe mawrekh u fulhonaththe l’6 yarhe hrene elo bshart dmitahwelen an’aghre awkith a mcashat deththe ma shutose dekfelhiwo ebaye dketne cayed li shultonutho d’Boghdod.

U sabab derfedlen a dayrat d’Boghdod dembayni a mcashat yarhonoye da fqide du camaydan dejbiri demgalwen lu qlimo d’Kurdistan, cal da fulhone deksaymilen masrene cami mshablonutho dekmiqadmo lu yuthrono da shutose du qlimo, ubu sheklano a fqide du camaydan hani zabno kcayshi b’kriz momomunoyo.

Cali sbuthathe, u mathlono du camaydan bu parlamento du Iraq qoyumo Luis Garo merle “i sictho da galwoye bu parlamento kemcaqbo i sbuthathe, ucal dketno hadomo bi sicthathe eno farsufoyith gdemcaqabno i sbuthathe”. 

Bcayni zabno, qoyumo Garo mawdacle dgemisem u mnoyo da fqide du camaydan dekfehi ba shutose du qlimo, ugedhoweste droshe camu mawtbo da wazire d’Boghdod ucamu mawtbo da wazire d’Arbil, bnisho dmeshroyo i sbuthathe b’zabno karyo.