Ftih qentrun lu hulmono di iqartho bi qastra d’Baghdede bu Shalwo d’Ninwe. Lu zawho du futohano meshtawtafle menyono ma mshale di highmonutho d’Ninwe u mathlone ma gabe u shutose d’Baghdede.

Bi rocyutho di dayira du hulmono d’Ninwe, u shutoso du hulmono d’Baghdede yawme d’hushabo dshaficina semle u futoho du qentrun di osyutho di iqartho.

Lu zawho du futoho hader u mcadrono du mdabrono gawonoyo di dayira du hulmono d’Ninwe Cadel Muhammad İsmacil, u qaymaqam d’Baghdede Naysan Razzuqi, u rishono du Mawtbo di qastra d’Baghdede (H)sen (H)amad Altayi u mathlone ma gabe u tukose d’Baghdede cam menyono celoyo man’abne du camaydan.

Bu mamlo dsemle u mdabrono du shutoso du hulmono d’Baghdede Saced Karrumi mqadamle a tawdyothayde li dayira du hulmono d’Ninwe demtabaqla u sistem di osyutho di iqartho b’Baghdede, udekmehshu u qentrun qadmoyo dekmishates bu haqlano larwal mi mditho d’Mawsal.

Camgabedathe, u mshalo di osyutho di iqartho bi dayira du hulmono d’Ninwe Muhammad İsmacil bu mamlo dhuwle mahkele cala yuthrone dketle u sistemano dilonoyith bether medmaksharle u tedbiqayde ban athrawotho tibeloye bi mshablonutho dkemqadamla li iqartho.

Bether medkamile a mele da zmine, qis u shrito du futoho u karikhi a hadire bu benyono du qentrun hatho di osyutho di iqartho b’Baghdede.