U rishqutno d’Almanya Christian Wulff mestacfele mi wolithayde. Wullf bu knushyo dsim lu tboco froso mu qusro di rishqutnotho mashmacle dhule i isticfayde. Calathe i rishathwazire Angela Merkel mawdacla i hzinuthayda.

U rishqutno d’Almanya Christian Wulff bu knushyo dsim adyawma bi shoctho da 11 d'safrayto bu qusro d’Bellevue mawdacle i isticfayde. Wulff demqadamle a tawdyothayde li bethzawgayde uli eqarthayde mashmacle, u rishono du mawtbo da mmathlone, wu rishono di marcitho d’Bawyera Horst Seehofer gedmoyed i wolithayde leshan zabno. Bu mamlayde di isticfa Wulff dmawdacle, Almanya ketla sniqutho l’rishqutno dketle u tukhlono di sagiyutho du kensho, merle, “ma gedshe dcishi ba shabe dshafecina, fayesh layto mkono demdawamno bi wolithathe. E haymonutho ebi twiro.”

Cala iddicat dkito bhaq detheste Wulff me akadle, huwe semle harake lfuth di wolithayde, wa tebe dkito bhaq dide macjazze huwe wi bethzawgayde ghalabe. Cam Wulff bu knushyo dlu tboco froso ketwoste i bethzawgayde Betina Wulff. Christian Wulff dketyo cemre 52 eshne, u rishqutno da 10 d’Almanya we, ubcayni zabno u rishqutno dbu cemro nacimo dhollocdoyo.

I rishathwazire Angela Merkel bi mawdeconutho dhule lu tboco froso bhaq di sbuthathe mawdacla, mestaqbela u fusqono d’Wulff b’iqoro rabo, ube hzinutho. Merkel dembayanla Wulff dhule aghuno leshan Almanya ftehto u modern, mathkarlaste, tleblaste a dabe du koalisyon udi saqebloyutho dmoten l’awyutho bha mrashho leshan di rishqutnotho.

A shushotani athen lu hwoyo bether med i mdimqinutho d’Hannower demqadamle mrajaca dmitaqem u mnoco du tehshiwo dkito calu rishqutno Christian Wulff. Bi maqerhonutho dhiwo mi mqimdinutho d’Hannower athmel mawdec, bether med sim buhone rwihe bhaq da dokumane, uda tebe du tboco froso, khliq shubha bhaq du rishqutno dmofeq manfaca farsufoyto leshan druhe. Bu shekelano inaqla qamayto bu makthabzabno d’Almanya tlib dmitaqem u mnoco du tehshiwo awkith i imunitat dkito cal rishqutno.

Wulff bu zabno dketw rishwazirutho di marcitho d’Saksonya nafeq li holo, dmedle kredi dilonoyo me mored dshughlo, usemle nyuhto ba willat da mored da shughlone, Camgabedathe dnafeq li holo du rishqutno Wulff semle hboso cal meshtaylono de sfaryawmo leshan dlo fores a tebani, mawzadwole u talab di isticfayde. Bether mathe Wulff mjarable btahrazto hayo demfane an’iddicat dkito bhaq dide, tlebwole shubqono cala fawde dsemle, elo huwole garanti bu zabno dketwe rishwazire di marcitho lo mestacmele i wolithayde lo towo. A funoyo d’Wulff camgabed dlomaqnacle u kensho kulonoyith, elo manqaswole a qrayyotho di isticfa.