I tarmitho du bnoyo da n’arbco burge bi qastra d’Ankawa makelyo. Bu fusqono dmedla i rishonutho du qlimo d’Kurdistan, i tarmithathe mu tathir du hboso camoyo dhawi mqabel dida makelyo.
 

Bu tebo defresla i dafo du nawlo d’Ankawa mawdec du Makethbo du rishono du qlimo d’Kurdistan Mascud Barzani, wu Diwan di highmonutho d’Arbil adyawma safrayto hulen amro dmitakelyo i tarmitho du bnoyo da n’arbco burge bi qastra d’Ankawa.

U fusqonano belhude bether me tre yawme mu tebdiyo di tarmithathe athi luhwoyo, ubcayni zabno ftih buqore bhaq di sherke d’Ashurban dketyo mored di tarmitho.

Hani ba yarhe a gabe u tukose du camaydan, a Citotho wa n’abne du camo Kaldoyo-Suryoyo-Othuroyo d’Ankawa, bu aghuno dmahwelen qadiri dmaklen i tarmitho da n’arbco burge dgedsaymowa shuhlofo demoghrafoyo b’Ankawa ugdemathrowa bshekel mrimono negativ cala diloyotho du camaydan bi fnitho, mu sabab da bote dgemitacmeriwo b’Ankawa gedmizabniwo la nukhroye b’fiyat ghalabe timo, bu zabno dlatla i claymutho du camaydan mkone dsheqlo hawkha bote.