U Kunosho da Tukose Folitiqoye du camaydan u Kaldoyo-Suryoyo-Othuroyo semle knushyo hatho bi highmonutho d’Arbil. A mathlone da gabe u shutose dmeshtawtaflen lu knushyano mbayanlen a talabe du camaydan dgemiqadmi bu lumodo athronoyo du shbuqyo bu Iraq.
 

I sictho du cuqobo udi zdirutho dketyo ma sicotho du Kunosho da Tukose Folitiqoye du camaydan, athmel semla knushyo hatho bi qastra d’Ankawa bi highmonutho d’Arbil. U knushyano mtayeb bu qentrun du gabo Athronoyo Othuroyo bnisho dmibayno i tahrazto dilonoyto da talabe uda sebwotho du camaydan dgemiqadmi bu lumodo athronoyo du shbuqyo dekmenter dmeqter b’Boghdod cal qariwo.

Bu shuroyo du knushyano mawdeci a shushote folitiqoye hathe, i netije da knushye dsimi be Boghdod bu taro da hedriyat du lumodo wa sebwotho dembayni bi tahrazto da fulhonayde.
Bether mathe drishi a zedqe wa talabe du camaydan u Kaldoyo-Suryoyo-Othuroyo bu masheqlano ducdo ubu dactid, bnisho dmirozi b’egartho lashan dmiqadmo bu lumod athronoyo.

İ egartho dembayno kmishaklo ma khtute rabe dcalu haqlo folitiqoyo, umthoyo u marduthoyo du camaydan baynothaye a sebwotho dketlen asirutho cami golutho gawoyto du camaydan wi goluthayde lan’athrawotho hrene wa darbone du shroyayda, wu camaydan dlekmoyed duktho ba fusqono folitiqoyo, uhano aydarbo kiba dmeshre, dmitabqo i tarmitho du shetoso du qlimo dilonoyo bu Shalwo d’Ninwe cam sebwotho u zedqe hrene dketlen asirutho cama qonune dekmitaybi wa shuhlofe du nomuso esonoyo du Iraq.

İ egarthathe gedmedrosho berwihutho mi sictho mdabronitho du Kunosho da Tukose Folitiqoye du camaydan ba knushye shnize dgemisomi ba yawme debqamuthayna, bnisho dmiqadmo bshekel kamilo umhaydo beshmed du Kunosho lu lumodo Athronoyo du shbuqyo.