Bu buyono de fresle u Huyodo Suroyo d’Urifi ESU, maslele uhjomo dsimi calu hudro marduthoyo du camaydan b’Hazakh. Bu buyonano ESU ktoleb ma mshale qlimoye, demqafen ahayobe du hjomano udmitawfeqi lqum di kinutho.
 

U Huyodo Suroyo d’Urifi ESU, fresle adyawma buyono mi arishkoyto Urifoyto Bruksel mqabel du hjomo dsim 12 bu yarhano calu Hudro Marduthoyo da Suryoye d’Hazakh.

Bu shuroyo du buyono ESU kmawdec, utacbo rabo dhawilen acomure bu bnoyo du Hudro Marduthoyano demshataswo ba 2001, leshan ayaqrotho dfayeshi bi qritho makthabzabnoyto d’Hazakh, dmeshtaclea dawro khed nuqazto olsoyto lu camo Suryoyo bu haqlo marduthoyo, tawdithoyo u momunoyo.

Calu hjomano dsim calu Hudro d’Hazakh dhesh lekmidoci ahayobayde manne, ESU kmawdec berwihutho afulhonaththe khed Huyodo, gedemdawmi demcaqbi isbutho du camo Suryoyo b’Turkiya bu masheqlo folitiqoyo shahinano dekshofec adyawma athro ebe.

ESU bu buyonayde keme aked, icasqutho wa qetre dshafec eshqad ucamo Suryoyo ebeyye bu haqlo da dacwat du tabo udu qadastro dan arcotho, udhani saliqi la botaydino. Wi dacwa di Dayro d’Mor Gabriel dmasleqo lu bethdino da zedqe noshoye d’Urifi, mathlo ma sebwothani’yo.

Calathe u Huyodo Suroyo d’Urifi tleble mi shultonutho uma mshale qlimoye dfulhi bshekel jeddi, leshan demqafen ahayobe du hjomo cjiqano dsim calu Hudro da Suryoye udemqadmilen lqum di kinutho.

ESU bu huthomo du buyonayde, kemqademste usnodo wi hawruthayde lu mshalo ugawonoyith la hadome du Hudro Marduthoyo d’Hazakh kulle, ukeme akedste cali olsoyutho di ithuthathathe uda fulhone marduthoyathe leshan u camo ulu jil dgedothe. Calathe klozem amshale du qlimo dmaklen qum da hjomani udemsayteri ucamo Suryoyo leshan demdawem bi ithuthayde bu athro dan abohothayde.