Rabhaylawotho Rami Sami Abdush dketyo farsufo Suryoyo mi mditho d’Hemes qtil. Lu cufoyo du rabhaylawotho Abdush meshtawtafle menyono ma hsayo me Citotho mshahelfotho uba 100'wat d’Suryoye mi mditho d’Hemes.
 

U claymo Suryoyo rabhaylawotho Rami Sami Abdush ba yawmotho shafecina qtil cala thume d’Lebnon u d’Suriya bu zabno deksamwo i wolithayde bu gayso d’Suriya. Rabhaylawotho Abdush dcemre 25 eshne falohowe bu gayso.

Bether med mawdec u tebo du qatlayde, i claymutho Suryoyto di mditho d’Hemes mestaqbela i shlado du rabhaylawotho Cabdush, u ba helhole u ba klile da warde tcino i shlado cala katfotho huli Cito d’Yoldath Aloho da Suryoye Ortodoksoye.

U zawho du cufoyo d’rabhaylawotho Abdush mrayshanle u hasyo di marcitho d’Hemes ud’Hama di Cito Suryoyto Ortodoksoyto Mor Silvanos Betres Alnecme, u hasyo di marcitho d’Hemes ud’Hama di Cito Suryoyto Qatholiqoyto Mor Theofilos George Kassab, u mathlono di marcitho d’Hemes da Suryoye Malkoye Ortodoksoye Khuroyo Alyas Cabduka, cam menyono ma kohne me Citotho mshahelfotho, uba 100'wat d’camo Suryoyo dekhoye bi mditho d’Hemes.

Bu mamlo dsemle hasyo Mor Silvanos Betres Alnecme mqadamle a buyoyayde li iqartho du rabhaylawotho Abdush dketyo idecto bi hubayda li Cito, utleble drekwo i mshaynutho bu athro d’Suriya.

Bether medkamel u zawho du cufoyo, i shlado du rabhaylawotho Rami Sami Abdush mawbelo la betheqbure da Suryoye b’Hemes.