Sictho da guboye d’AKP semla socurutho lu hudro Suryoyo d’Stanbul Mezo – Der.  Bi sicthathe camgabed da hadome d’AKP ketwo u rishono du mawtbo du nomuso esonoyo, u rishono di karkhutho d’Fatih umshale hrene mu gabo. A mshale, wa hadome d’Mezo – Der ba droshe dhawilen cami sictho d’AKP kalen cali olsoyutho dmimathel u camaydan bi hiyoyuthayde i camoyto.

11 bu  yarho d’İyor i sictho da guboye d’AKP  semla socurutho lu hudro du camaydan, u dreshla cama hadome, wa mshale du hudrano. E sictho d’AKP kmishaklowa mu rishono du mawtbo du nomuso esonoyo qoyumo Profesör Doktor Burhan Kuzu, u rishono di karkhutho d’Fatih Musa Demir, u rishono d’AKP d’Fatih Hamdi Görk, u mrashho dli qoyumutho d’Stanbul Ahmet Yeldez, u rishono du koordinasyon da guboye Tansel Kaya cam menyono ma hadome du gabo d’AKP.

U rishono du hudro d’Mezo Der Turgut Alaça dmahkele calu hudro, u cali aykanoyutho da Suryoye b’Terkiya, kali cali olsoyutho dmitahwe u zedqe du tewlifo du leshono Suryoyo.

Tuma Özdemir’ste dmawdacle d’Mezo Der dketyo hdo ma dawsat qadmoye da Suryoye dhowen siwil, umshalatle u bahro cali olsoyutho di dawle dmaydo li deqqa a’tukose camoye khed Mezo Der.

Yusuf Atugh’ste dketyo ma hadome du hudro mawdacle a Suryoye hesh lo qmerre u statu huquqi b’Terkiya. Wa Suryoye dkette u zedqo di qalelto b’Terkiya, elo bu pratik lo mestafadde mu medano. Atugh merle, ” u gabo d’AKP dlo medle li lohithayde mrashho Suryoyo nuqsabuniye rabtho kehzenola.”   

U hadomo di sictho mdabronitho  du hudro SHabo Boyaçe mahkele cala shushote mrimone negatif dkowe bi sbutho dan arcotho d’Mor Gabrile, wi lo thnihoth dkette a Suryoye bi sbuthathe. Hadomo hrenoste du hudro d’Mezo Der SHemun Alaça dmahkele i haymonutho beyn di dawle uda Suryoye latyo makifyonitho, mathkarle di haymonuthathe klozem dmitazido.

Jan Naçar’ste dketyo malfono bi bethsawbo d’Koç kali calu shwolo du mahduro, umshayele shwole calu maskhoro d’10 ba mo dlu cboro lu parlamento.