Emwotho Mhaydotho maqbela i rmoyto demqadmole u Huyodo Caraboyo mqabel du cnufyo dekmisem b’Suriya. I rmoytathe dem'aydo mi sagiyutho dan athrawotho hadome b’Emwotho Mhaydotho, gedmazido u hboso calu rejim d’Suriya b'nisho dmitakle u cnufyo, u dhowe demoqratoyutho bu athro.

U hjomo folhoyo dmabdewole u gayso d’Suriya mqabel di mditho d’Hemes hesh kemdawem. Camgabedathe, adyawmaste cam cruto hathto lu snodo d’Hemes, mtayeb tagelyotho du protesto bu slogan "u mrodo camoyo".

An abne du camaydan dekfelhiwo khed fqide ba shutose di shultonutho d’Boghdod, ucdo kloqen qetre u casqotho momunoye bether mdemgalwelen lu qlimo d’Kurdistan. A farsufani dmaqbele u qlimo dfelhi bcayni wolitho, ba zabne haroyani lefayesh kmitahwelen aghre awkith mcashat du yarho.

Ftih qentrun lu hulmono di iqartho bi qastra d’Baghdede bu Shalwo d’Ninwe. Lu zawho du futohano meshtawtafle menyono ma mshale di highmonutho d’Ninwe u mathlone ma gabe u shutose d’Baghdede.

U rishqutno d’Almanya Christian Wulff mestacfele mi wolithayde. Wullf bu knushyo dsim lu tboco froso mu qusro di rishqutnotho mashmacle dhule i isticfayde. Calathe i rishathwazire Angela Merkel mawdacla i hzinuthayda.

U camo d’Libya mcayadle u yawmo shatonoyo du tedriyo du rejim diktator d’Mucammar Qaddafi. Me gabo hreno nafeq li holo bether med khaliso i mdabronutho d’Qaddafi, u camo d’Libya ocdo kobec mdabrono qawyo.

Kul shato kmoyeth 2,6 milyone d’tloye mu kafno. U kafno bcemro nacimo, kkholeq kewe nafshonoye ugushmonoye dekiben deme athri cal jil kamilo. Imawdconuthathe, friso bu tashroro shatonoyo du tukoso Emwothoyo di mcadronutho da tloye.

I tarmitho du bnoyo da n’arbco burge bi qastra d’Ankawa makelyo. Bu fusqono dmedla i rishonutho du qlimo d’Kurdistan, i tarmithathe mu tathir du hboso camoyo dhawi mqabel dida makelyo.
 

U Kunosho da Tukose Folitiqoye du camaydan u Kaldoyo-Suryoyo-Othuroyo semle knushyo hatho bi highmonutho d’Arbil. A mathlone da gabe u shutose dmeshtawtaflen lu knushyano mbayanlen a talabe du camaydan dgemiqadmi bu lumodo athronoyo du shbuqyo bu Iraq.
 

Bu buyono de fresle u Huyodo Suroyo d’Urifi ESU, maslele uhjomo dsimi calu hudro marduthoyo du camaydan b’Hazakh. Bu buyonano ESU ktoleb ma mshale qlimoye, demqafen ahayobe du hjomano udmitawfeqi lqum di kinutho.