GALA DA 8 D'SUROYO TV

01.10.2011 B'MÄRSTA (Sweden)

I Gala da 8  du yawmo shatonoyo da 7 eshne d’SuroyoTV, b'fsihutho rabtho mcaydo bi mditho d'Märsta bu athro du Swed.  I Galathe, cam zmoro, mamle u raqde; hol la shoce mcawqe du lalyo mdawamla. Bi galathe demyaqri 6 mshatsone hathe, simstene u grosho du lottery di radeyto Toyota Auris Hybrid dnafiqo lu athro d’Almanya.

İ tahrazto dilonoyto di Gala demqadmo ma hawroneydan Yawsef Beth Turo u Sargonta Oshana, bi shoctho da 21.00 msharela bu salon di Cito d'Mor Yuhanon Shliho da Qelthoye bi mditho d'Märsta.

Bi meshtawtfonutho d’500 farsufe u bu snodo d'zed me 80 sponsore, zmerlen eba zamore Rami Adam, Nani Simonian, Kamil Hanna wu koral di Cito d’Mor Antonios dathiwo mu athro d’Beljika.  Zamoro Aboud Zazi cal dketwe kayiwo, hader bi Gala elo lo qader dzomer.

U rishono d’Babilon Media Föreningen BMF Abdo İzgin, u rishkarkhutho d’Märsta  Anders Johansson mu gabo da Sosyal Demoqratoye, Dayroyo Samuel Özdemir mi Cito Suryoyto Qatholiqoyto, Khuroyo Gabriel Bar Qasho b'eshme di Cito Suryoyto Ortodoksoyto di Marcitho du Swed u  Skandinavia u Gabriel Karademir’stene b'eshme di Cito d’Mor Yuhanun Shliho d’Märsta; mqadamme mamle.

Bi Galathe hawiwo 6 mshatsone hathe dketwen Dayroyo Samuel Özdemir, u Hudro da Qelthoye  Märsta, i Cito d’Mor Yuhanun Shliho, u Mdabrono d’OLCEA Ibrahim Uncu,  Abdo Ceylan u Afrem Akay Beth Dawo.

Camgabedtahe, i Sictho d'Suroyo TV b'Hollanda, i eqartho d’Elizabeth Haffo u Habib Aras qayethlen ashukone d’SuroyoTV mu sabab du snodo maddi u macnawi mahwelen hol ucdo l’SuroyoTV.

U grosho du lotteri dsemwo bether mi shoctho da 00.00 du lalyo, nafiqo li numara d’0164 d'zwin me Zeki Aras dekhoye bi mdito d’Paderborn d’Almanya.

Wu remzo (u logo) d’SuroyoTV dmawfaqwo lu mazad, Sait Savci mi mdito d’Västeros zwenwole b’60.000 krone. Bi tahraztathe, camgabe dan egrotho da mfarjone deqrenwo, semwostene maqeblonwotho cama hadire.

İ tahrazto mdawamla hol li shoctho 01.45 qatinotho bu froso hayo, wu hago kamelwo ba 02.30 b'falge d'lalyo.